Русская версия
English version
მიშა და სომხები, ანუ ვისი პრეზიდენტია სააკაშვილი?
შარშან აგვისტოში, თურმე, ჯავახეთისკენ მიმავალი რუსული ტანკები, რომელთა მიზანსაც ნავთობსადენის დაპყრობა წარმოადგენდა, შეაჩერა სპეცრაზმმა, რომელიც «100%-ით სომხებისგან» შედგებოდა. მათ რუსებს განუცხადეს, ამის მერე «მხოლოდ ჩვენს გვამებზე გადაივლით და ისე გააგრძელებთ გზასო». მცირე ხნის მოლაპარაკების შემდეგ რუსები უკან გაბრუნდნენ.
იცოდით?
არა?
იცოდით, რომ საქართველოში თურმე ეთნიკური ნიშნით (100%-ით სომხებისგან) დაკომპლექტებული «სპეცნაზები» არსებობს?!
არც ჩვენ!
ზღაპარს კი არ გიყვებით, ეს სიტყვები მიხეილ სააკაშვილმა თქვა სომხეთის დედაქალაქში ერევნის სახელმწიფო უნივერსიტეტის პროფესორ-მასწავლებლებთან შეხვედრაზე.
არც სომხებს სცოდნიათ და მიშამაც ზარ-ზეიმით აუწყა!
ჩვენ გვეგონა, რომ რუსების არმია, რომელიც მთელი საქართველოს აღებას გეგმავდა, ევროპის მხარდაჭერამ, საფრანგეთის პრეზიდენტის თავგამოდებულმა შრომამ, მსოფლიო საზოგადოების პროტესტმა და თითო-ოროლა ღირსეული ქართველისადმი კრემლში შემორჩენილმა პატივისცემამ შეაჩერა.
თურმე, ვცდებოდით!
თურმე, ახლა რომ ამ წერილს ვწერ, თქვენ რომ კითხულობთ, პრეზიდენტი რომ ისევ მიშაა, ოპოზიცია რომ ისევ «გრეჩიხაა», «კავკასია» რომ ისევ აქუბარდიასია, საქართველოს საფეხბურთო ნაკრები ისევ რომ აგებს, საქართველოს საერთოდ რომ ჰყავს საფეხბურთო ნაკრები, რუსთაველი რომ ისევ გადაკეტილია და ნახევარმა საქართველომ ჯექსონს რომ არ გავასწარით იმ ქვეყნად - ეს ყველაფერი «100 პროცენტი» სომხებით დაკომპლექტებული «სპეცნაზის» დამსახურება ყოფილა!
დიდი მადლობა პატრულს კი არა და, სომხებს!
რა კარგია, ასეთი მეზობლები რომ გვყავს! საინტერესოა, ამ მეზობლებთან, ერთ მშვენიერ დღეს «საქმის გარჩევა» რომ მოგვიწიოს, ვის მხარეს დაიკავებს «100%-ით სომხებისგან» დაკომპლექტებული «სპეცნაზი» - ქართლოსის თუ ჰაოსის?!
ცოტა რომ გაგვივლის ეს ეიფორია, მეზობლების სიყვარულის გახეთქილი ბუშტი ისევ რომ გაგვეკერება და რომ დავწყნარდებით, ვარიანტი არაა, რომელიმე ნორმალურად მოაზროვნე ადამიანმა (ჩვენ თუ აღარ დაგვრჩა, სომხებს ჯერ კიდევ ხომ მაინც ჰყავთ ასეთები) არ გაიაზროს, რომ რაღაც ისე ვერაა, როგორც მიშამ მოგვახსენა...
ჯერ ერთი - ეგ რომ სიმართლე იყოს, მიშა დაასწრებდა სომხებს მაგის თქმას? აქამდე ხომ ათასჯერ წამოგვაყვედრებდნენ - ჩვენ გადაგარჩინეთო!
მერე კიდევ - თუ «100 პროცენტი» სომხებით დაკომპლექტებული ძლევამოსილი სპეცრაზმი საქართველოს სადარაჯოზე იდგა, თუ ყველაფერი კარგად იყო და თუ არაფერი გვემუქრებოდა, მაშინ რატომღა ვაწვალეთ ნახევარი ევროპის პრეზიდენტები (განსაკუთრებით, ერთ-ერთი, მგონი, ესტონეთის პრეზიდენტი იყო, ზუსტად არ მახსოვს, მოხუცი კაცი), რატომღა ვარბენინეთ რუსთაველზე და რატომღა ვამღერეთ ხელიხელჩაკიდებულები «თავისუფლება ლომთა ხვედრია»?
მესამეც - თუ ასეთი მაგრები არიან სომხები, რომ ერთი სპეცრაზმით რუსეთის ჯარის სატანკო კორპუსი უკან გააბრუნონ, ხომ არ ჯობია, საერთოდ აღარ გავიწვიოთ ჯარში ქართველები და პირდაპირ სომხები დავიქირაოთ მებრძოლებად?!
«რუსეთს ფეხზე ეკიდა სომხეთის ინტერესები. მათი ძალები სწორედ იმ სატრანზიტო გზებს, ხიდებსა და რკინიგზებს ურტყამდა, რომლებიც სომხეთში მიდიოდა, - განაცხადა სააკაშვილმა, - მე დამირეკა რობერტ ქოჩარიანმა და შემატყობინა, რომ რუსებმა ლარსი ჩაკეტეს, ოღონდ მხოლოდ ქართველებისთვისო. ჩვენ სიამოვნებით გაგვატარებენო. მე ვუთხარი, რომ ქართული პოლიცია ნახევარ საათში ასობით ქართულ სატვირთო მანქანას გასწევდა გვერდზე. ასეც მოხდა, მაგრამ სომხეთის მაშინდელმა კოლეგამ ორი დღის შემდეგ დამირეკა და მითხრა, რუსები გზას არ ხსნიანო. ეს აშკარა პროვოკაცია იყო».
გამოდის, რომ გასული წლის აგვისტოში რუსეთს საქართველოსთან კი არა, სომხეთთან ჰქონდა ომი!
მოკლედ, ამ უთავბოლო სიტუაციას ამოხსნის ორი შესაძლო გზა აქვს, ორი ვარიანტი: ან რუსეთს სომხეთის დაბომბვა უნდოდა და შეეშალა, ან კიდევ, მეორე და უფრო სავარაუდო - სააკაშვილი რეალურად სომხეთის პრეზიდენტია!
ალბათ, ამიტომაცაა, რომ ასე იოლად თმობს საქართველოს ტერიტორიებს და ამიტომაც იკლავს თავს სომხეთიდან ახალქალაქის გავლით ყარსში რკინიგზის გასაყვანად და, ერთ-ორ ოპოზიციონერს თუ დავუჯერებთ, მზადაა, ჯავახეთიც სარქისიანს უფეშქაშოს.
ჰოდა, თუ ასეა, მინდა, მივმართო ჩვენს ისტორიულ მეზობელ სომხებს:
- «რუბიკჯან! ია ტებე ადინ უმნი ვეშჩ სკაჟუ, ტი ტოლკო ნე აბეჟაისია»! ხო მაინც თქვენია ეგ ჯიგარი პრეზიდენტი სააკაშვილი, რომელსაც «ნა ზაპადე» დემოკრატიის «მაიაკს» ეძახიან? ჰოდა, ადექით და წაიყვანეთ, რაღა! მაინცდამაინც ჩვენ უნდა ვუქნათ ვავა? წაიყვანეთ და თქვენსას ანათოს მაგ «მაიაკმა»! თანაც, თქვენ ხო ზღვა არ გაქვთ და «მაიაკი» მაინც გექნებათ, რა!
ჩვენც დავისვენებთ და თქვენც განათდებით დემოკრატიის «მაიაჩნი» შუქით!
ასე არ ჯობია?
ლექსო ლეკიაშვილი
გააგზავნე სტატია
დასაბეჭდი ვერსია
ტექსტური ვერსია| კვ | ორ | სა | ოთ | ხუ | პა | შა |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
კომენტარები (15 კომენტარი):
mec mikvars aseti statiebis wera.
საქართვალოში ქართველიზაცია არცერთმა ეთნოსმა არ გაიარა ამაში მხოლოდ საქართველოა დამნაშავე...
midit, midit antixachikebo, xochax! aseti siZulvili vnaxot ras mogvitans! osebic da afxazebic xom iyvnen troias cxenebi, koloniebi, naxmebi...da saertod kremlis agentebic! movaSoreT! axla xaCikebisa da mamedebis droa! mere iqneb acharlebis...male turq-mesxebic camovlen...movaSorebT, mere visze gadavalt tu icit? xvela mteria chvens irvgliv, chvensgarda, xvela ucxoa...xvela kadavrad gvinaxavs...raRa vlaparakobT tyuilad demokratiaze, roca faSizmze vocnebobT?!
დატოვეთ კომენტარი